"Flugslys"

Samkeppni er ekki íslenskt orð, fyrirtæki á Íslandi hafa ítrekað kvartað yfir því að skilningur á þessu orði sé engin, þar af leiðandi getur þetta orð ekki verið íslenskt . Síðasta dæmið um þann ósóma sem orð sem engin skilur geta valdið, var þegar Icelandair og Icelandic Express voru neyddir til að hækka gjöld umfram allt eðlilegt vegna kostnaðar við að fjarlægja slíkan vírus úr tölvukerfi.

Síminn og Vodafon sendu frá sér sameiginlega yfirlýsingu (það sparaði kostnað) þar sem þau harma að flugfélögin hafi ekki haft samband við sig áður en þau réðust í þann mikla kostnað að fjarlægja þennan ósóma, þar sem Síminn og Vodafon hafa fyrir löngu síðan hannað forrit sem eyðir samkeppni (við eigum að sjálfsögðu við orðið) og lítið mál að lána.

Tryggingarfélögin ásamt olíufélögum vilja ekki blanda sér í þessa umræðu og benda á upplýsingarfulltrúa Rannsóknarlögreglu.